حلا شيحة تثير جدلا بالهجوم على تامر حسني
هاجمت الفنانة المصرية حلا شيحة المطرب تامر حسنى بعد طرحه فيديو كليب أغنية “بحبك” من فيلم “مش أنا” والذي يتضمن مشاهد رومانسية تجمعه بها، وذلك على خلفية تبرؤها سابقا عبر صفحتها الشخصية من العمل.
وأعلنت الفنانة “توبتها” عن المشاهد الرومانسية، على حد عبارتها، كما انتقدت زملاءها فى الوسط الفنى قائلة: “متأكدة أن زملائي جواهم خير، بس للأسف فتنة الشهرة والنجاح مش بتخلينا نشوف ونقيس الأمور صح”.
وكتبت حلا شيحة عبر حسابها بموقع إنستجرام مهاجمة تامر حسنى “أنا اتفاجئت جداً بنزول كليب يجمع فيه مشاهد متفرقة من الفيلم، وخصوصاً بعد آخر بوست نزلته ووضحت فيه أنا إيه، واتفاجئت أكتر خصوصاً بعد وعد تامر حسني ليا وتأكيده إنه حیحترم رغبتي وبعض الطلبات اللي طلبتها منه بكل احترام وود الصيف اللي، فات وأکدلي إنه حيحترم رغبتي”.
وأضافت شيحة: “إحنا يمكن نجحنا بمقاييس الدنيا بس صدقوني بمقايیس ربنا احنا لم ولن ننجح”.
وتابعت قائلة إنها تعلن “توبتها” عن المشاهد الرومانسية التي أدتها خلال أعمالها الفنية.
وأكملت حلا شيحة :”إحنا كلنا عندنا امتحان في الدنيا دي وحابة أفكرك بالفيديو ده یا تامر اللي قولت فيه أنا مش بتمني أموت وأنا مطرب أنا دايما خايف کده.. كلام أكيد قولته في لحظة صدق جواك وجوانا كلنا، شوفه تاني يمكن يفكرك إن جواك أكيد في صراع”.
وقامت حلا شيحة بإلغاء متابعة تامر حسنى على إنستجرام ؛ رغم مشاركتهما مؤخرا في فيلم “مش أنا”، وغابت عن العرض الخاص للفيلم، وعلقت قائلة: “بحمد ربنا أنى أخيراً لقيت التوازن إنى أكون سعيدة فى حياتى”.
من جانبه، رد تامر حسني على ما أطلقته حلا شيحة عبر صفحته على “فيسبوك” قائلا: “نهاركم جميل يا أغلى الناس الحقيقة عمري ما بتخيل إني أدخل في نقاش بالشكل دا مع زميل بحترمه و كان في بينا كل خير”.
واستكمل: “للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصيًا ونتناقش بيني وبينك، فأنا مضطر أرد هنا برضو.. أولًا أنا عمري ما وعدتك إن الكليب مش هينزل دا محصلش اصلًا يا حلا مش أنا خالص اللي أوعد وأخلف.. الحقيقة إني إحترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابه تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجوده”.
وتابع تامر حسني: “وبعدين الفيلم بقاله ٣ أسابيع في السينمات والكليب موجود جوه الفيلم هو بالنسبالك الحرام إننا ننزل الكليب على اليوتيوب بس، إنما الكليب يتشاف جوه السينمات عادي؟ منطق غريب فعلًا يا حلا، وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه! هو مش إنتي اللي صورتيه ومثلتيه بنفسك وبمنتهى الرضا ولا حد أجبرك؟ وللتوضيح للجمهور الكريم أنا والمخرجة الأستاذة سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا وتليفوناتك كلها كانت بتقفل في وشنا”.
وأضاف: “إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب إنما إنتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع وبقيتي تقفلي تليفوناتك وتكنسلي علينا كلنا وبعدين أي فيلم بيبقى ليه خطة مسبقة في الدعاية وإنتي عارفاها كويس ووافقتي عليها ودا كليب رومانسي يعني معقول كنتي عايزة المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلًا هو دا يُعقل “.
واختتم: “أنا زعلان منك جدًا يا حلا على مفردات البوست بتاعك الغير موفقة ومستحيل هرد بطريقتك اللي فيها تجريح واتهامات باطلة ليا إحترامًا لحجات كتير يمكن فايتاكي بس مش هتفوتني، وعلى فكرة أنا واثق إنك عارفة إني مستاهلش منك كدا وهكتفي بالتوضيح دا وربنا يهدي الجميع ويكتبلك كل الخير اللهم آمين”.
