شيرين عبدالوهاب تكشف تفاصيل جديدة عن أسباب انفصالها
كشفت الفنانة شيرين عبد الوهاب عن تفاصيل جديدة في علاقتها بزوجها السابق، حسام حبيب، وما دار بينهما خلال فترة زواجهما وما تبعها من أزمات تداولتها وسائل الإعلام خلال الفترة الأخيرة.
وقالت شيرين خلال مداخلة هاتفية لأحد البرامج التلفزيونية: “اطلقنا طلاق بائن لما قصيت شعري.. بعد ما هديت من الكارثة اللي حصلت حسيت إني مش قادرة أستغنى عنه وإني أديله فرصة تانية وكل اتنين مع بعض لما بيسيبوا بعض بيكون فيه فجر في الخصومة.. علاقة الزواج مقدسة لازم نحافظ عليها”.
وتابعت: “أنا كنت بحبه وفاكراه ابني مش بس زوجي، واهتمت بيه وعملت استوديو علشان شغلنا يتعمل فيه، اشتريت له كل الأغاني اللي عجبته بشيكات باسمي علشان أضمن له الأغاني دي متروحش منه”.
وأضافت: “لقيت بعد كده إنسان بيتهمني إني بقيت شبه أمه وإنه عاوز واحدة يتباهي بيها قدام الناس تبقى حلوة ورفيعة وكده.. كان فيه خناقات بالضرب والسحل على الأرض وشتيمة عمر ما فيه إنسانة تقبلها على نفسها”.
واستطردت شيرين: “بعد طلاقنا قلت أديله فرصة تانية بس بشروط وهو وجود بيت غير بيتي وحياتنا تبقى لوحدنا ويشتغل، أنا عندي بيت كبير وكان بيجي يزورنا كتير قبل الزواج، وكان بيتردد على البيت علشان كان فيه بيننا شغل في الاستوديو في البيت، وكنت بحاول أعمل تمهيد للبنات إنه مخرجش من حياتنا وإنه لسه بيخلي باله مننا لغاية ما بدأت الوعود تختفي وتتلاشى”.
وذكرت: “المشاكل رجعت تاني وقلة الأدب رجعت تاني بدون سبب، أنا لما بتعصب ممكن أسبب أذى لنفسي، وطبيبي نصحه إن في اللحظة دي إما يسيبني ربع ساعة أو أدخل الأوضة لغاية ما أهدى، كانت في كل خناقة يفضل قدامي يحرق في دمي وأعصابي لغاية ما أسمك الماكينة وأحلق شعري”.
ولفتت قائلة ” كنت محبوسة في أوضة نومي 24 ساعة في اليوم.. وعايشة مع زوج مبيشتغلش… الناس فاهمة كويس إني كنت بكدب عليهم، وكنت عايشة مع راجل مش بيشتغل وكل همه حب الامتلاك، متابعة ” كنت فاكرة إني بحاول أحافظ على بيتي، بس مكانش بيت، كان مصيدة فيران”.
وقالت: ” حسام حبيب خسرني أمي وأصحابي والسواق بتاعي، وشايف كل الناس متآمرة عليه، فصدقته ولكن الحقيقة مش كده، ولازم يتعالج نفسيا”، مستطردة: “غنيت وأنا قرعة عشان بناتي ميتعقدوش، وحسستهم إن ده نيولوك… قالوا إن حسام حبيب كتف شيرين وحلق لها شعرها.. وبالفعل هو اللي حلقلي شعري”.
وأشارت “كنا في الفورسيزون وزعلانه منه، وجالي صالحني، واتخانقنا، وكان عايز ينزلني بقميص النوم عشان نتطلق.. شوفت أيام سودة مع حسام ، وبعد الطلاق ومحاولة الرجوع فتحنا شركة هو رئيس مجلس إدارته”.