“مش عايز أقابلك حتى لو صدفة”.. عمرو سمير عاطف يرد على تصريحات مكي
رد المؤلف سمير عاطف على تصريحات المخرج والممثل الشاب أحمد مكي والتي قال فيها أن السيت كوم الشهير “تامر وشوقية” كان إخراجه وهو من قام بتطويره ليكون بهذا الشكل.
وأضاف مكي خلال حواره التليفزيوني في برنامج “معكم مع منى الشاذلي” أنه قام بدراسه الموضوع لتطوير شكل السيت كوم وصناعته في مصر خاصه بعد نفور المنتجين من هذه التجربة.
وجاء رد عاطف غاضبا على هذه التصريحات حيث قام بكتابة منشور طويل عبر صفحته الشخصية على موقع التواصل الإجتماعي فيسبوك قائلا: “الواحد ما بقاش فيه حيل يدخل فى جدال والموضوع ما بقاش فارق قوي وخصوصا أن “تامر وشوقية” كانت مرحلة عدى عليها سنين طويلة وانتهت”.
وأضاف: “الكلام اللى مكى قاله فى اللقاء عن “تامر وشوقية” العمل اللى كان بدايته الحقيقية والسبب اللى خلاه يبقي ممثل مش مخرج، كلام غير دقيق لأنه بيدى إيحاء أنه كان له دور فى تطوير الموضوع وكان سبب أن يبقي فيه حاجة اسمها ست كوم وأنه بيحب “يذاكر” الموضوع وبيقول “جبنا كتب” و”عملنا “وده كله كلام فيه مبالغة فى تصوير دوره”.
وأكد عمرو أن “الحقيقة هى أن مكي كان سيخرج المسلسل فعلا ولم يكن يقرأ الحلقات ولا كان بيجهز نفسه لإخراج العمل كما يجب أو -على الأقل – مثلما أنا كنت متوقع ومنتظر منه ولغاية ما قربنا نخلص كتابة كان مشغول في أعمال ثانية وما كناش بنشوفه خالص لدرجة إنى أنا اللى اشرفت على تصميم وتنفيذ ديكور الجزء الاول من المسلسل. ولما ابتدى التصوير مكى أخرج أول حلقتين وأنا وشريف عرفة -بصفته المنتج- والكتاب اتفرجنا عليهم وكان المستوي مش كويس ولو كان مكى استمر فى إخراج الحلقات ما اعتقدش إنها كانت ها تنجح، وقام شريف عرفة بوقف التصوير بعد الحلقتين لمدة أسبوع وقرر أنه سيخرج هو الحلقات ومكى ها يعمل دور هيثم وقد كان”.
وأضاف عمرو في منشوره: ” تامر وشوقية ما اتعملش لان مكى كان عايز يعمل حاجه مختلفة تامر وشوقية انا فضلت سبع سنين الف بيه على المنتجين والمخرجين لغاية ما شريف عرفه تحمس لانتاج العمل وشخصية هيثم مش من ابداع مكى لوحده انا والكتاب اللى اشتغلوا فى العمل وشريف عرفه ساهمنا فى خروجها بالشكل ده ولما مكى راح يعمل فيلم اتش دبور طارق نور طلب منى انى ارفع قضية عليه بصفتى مؤلف الشخصية وشريف عرفه كلم هشام سليمان اللى كان بينفذ انتاج الفيلم وقاله لازم تدفعوا للمؤلف وكان ممكن جدا بمنتهى البساطة اننا نوقف تصوير الفيلم لكن انا رفضت انى اتخذ اى اجراء ورفضت انى اخد اى مقابل من هشام سليمان وقلت لشريف عرفه انا ومكى كنا اصحاب وهو اختار انه ينهى الصداقة دى ويبقي نجم وفى الحقيقه ده تمن مش قليل يعنى الراجل ما باعش بالرخيص”.
وأختتم عاطف المنشور قائلا: “فى النهاية انا باحب تامر وشوقية جدا وخصوصا انى تعبت فيه قوي ومكى فنان كبير وموهوب مش بس كممثل لكن برضه كمخرج ومازلت شايف انه لو رجع يخرج مره تانيه اكيد ها يبقي مخرج من اهم المخرجين فى مصر ويمكن فى تاريخ السينما المصرية ..لكن للاسف الواحد بيضطر يتكلم عن نفسه وعن مجهوده لما يلاقي تصرفات وكلام بيعكس نرجسيه ورغبه فى التكويش على كل حاجه زى ده.. باتمنى التوفيق لمكى دايما بس ما اعتقدش وما اتمناش اننا نتقابل تانى لا فى شغل ولا حتى صدفة”.